പിള്ളയെ ആശ്വസിപ്പിയ്ക്കാന്‍ മമ്മൂട്ടിയും!

കൊച്ചി: ഇടമലയാര്‍ കേസില്‍ കോടതിയില്‍ കീഴടങ്ങാന്‍ പോകും മുമ്പെ ആര്‍ ബാലകൃഷ്ണ പിള്ളയെ ആശ്വസിപ്പിയ്ക്കാന്‍ ഒട്ടേറെ പ്രമുഖരെത്തി. രാത്രി വൈകി കൊട്ടാരക്കരയില്‍ നിന്ന് കൊച്ചിയിലെത്തിയ മുന്‍മന്ത്രി ആര്‍.ബാലകൃഷ്ണപിള്ള തേവര മട്ടന്നൂര്‍ ജംഗ്ഷനിലുള്ള ഫ്‌ളാറ്റിലാണ് താമസിച്ചത്. ഇവിടെ വെച്ച് പിള്ളയെ കാണാനും ആശ്വസിപ്പിയ്ക്കാനുമായി ചലച്ചിത്ര നടന്‍ മമ്മൂട്ടി അടക്കമുള്ളവരെത്തി.

സിപിഎം ചാനലായ കൈരളിയുടെ ചെയര്‍മാനും പാര്‍ട്ടി നേതൃത്വവുമായി അടുത്ത ബന്ധം പുലര്‍ത്തുന്നയാളുമാണ് മമ്മൂട്ടി. എന്നാല്‍ ബാലകൃഷ്ണ പിള്ളയുടെ മകനും ചലച്ചിത്രതാരവുമായ ഗണേഷ് കുമാറിന്റെ സുഹൃത്തെന്ന നിലയിലാണ് താരം ഇവിടെയെത്തിയത്.

കഴിഞ്ഞ ദിവസം രാത്രി ഗണേഷ്‌കുമാറും ഏറ്റവും അടുത്ത പാര്‍ട്ടി ഭാരവാഹികളും മാത്രമാണ് പിള്ളയ്‌ക്കൊപ്പം ഒപ്പമുണ്ടായിരുന്നത്. തേവരയിലെ ഫ്ളാറ്റില്‍ നിന്നും പ്രഭാതഭക്ഷണം കഴിഞ്ഞതിന് ശേഷമാണ് ബാലകൃഷ്ണ പിള്ള ഇടമലയാര്‍ കോടതിയിലെത്തി കീഴടങ്ങാനായി പുറപ്പെട്ടത്.