ശ്വേത വീണ്ടും മമ്മൂട്ടിയുടെ നായിക

പാലേരി മാണിക്യത്തിന് ശേഷം ശ്വേത മേനോന്‍ വീണ്ടും മമ്മൂട്ടിയുടെ നായികയാകുന്നു. ഷാജി കൈലാസ് സംവിധാനം ചെയ്യുന്ന ‘ആഗസ്റ്റ് 15’ എന്ന ചിത്രത്തിലാണ് ശ്വേത വീണ്ടും മമ്മൂട്ടിക്കൊപ്പം എത്തുന്നത്.

മുഖ്യമന്ത്രിയുടെ സ്വകാര്യ ഡോക്ടറായ സരിതാ ഹസന്‍ എന്ന കഥാപാത്രത്തെയാണ് ശ്വേത ആഗസ്റ്റ് 15ല്‍ അവതരിപ്പിക്കുന്നത്. ഈ ചിത്രത്തില്‍, മുഖ്യമന്ത്രിക്കെതിരെ വധശ്രമം നടത്തിയയാളെ കണ്ടുപിടിക്കാന്‍ ചുമതലപ്പെട്ട ഡി സി പി പെരുമാളായാണ് മമ്മൂട്ടി എത്തുന്നത്. പെരുമാളിനെ പല നിര്‍ണയക ഘട്ടങ്ങളിലും സഹായിക്കുന്നത് ശ്വേത അവതരിപ്പിക്കുന്ന സരിതാ ഹസനാണ്.

അനശ്വരം എന്ന മമ്മൂട്ടിച്ചിത്രത്തിലൂടെയാണ് ശ്വേത മലയാളത്തില്‍ നായികയായി അരങ്ങേറുന്നത്. പാലേരി മാണിക്യത്തില്‍ മമ്മൂട്ടിയും ശ്വേതയും ഒന്നിച്ച രംഗങ്ങള്‍ ആ സിനിമയുടെ ഹൈലൈറ്റായിരുന്നു.

‘യക്ഷിയും ഞാനും’ എന്ന ചിത്രത്തിലൂടെ പ്രശസ്തയായ മേഘ്നയാണ് ആഗസ്റ്റ് 15ലെ മറ്റൊരു നായിക. സൈബര്‍ സെല്ലിലെ ഓഫീസറായ ലക്ഷ്മിയായാണ് മേഘ്ന വേഷമിടുന്നത്.