മുഴുനീള മലയാള സിനിമയില്‍ മമ്മൂട്ടിയോടൊപ്പം അഭിനയിക്കാന്‍ താല്‍പര്യം-ഡിമ്പിള്‍ കപാഡിയ

തിരുവനന്തപുരം: മുഴുനീള മലയാള സിനിമയില്‍ അഭിനയിക്കാന്‍ ആഗ്രഹമുണ്ടെന്നും നായകന്‍ മമ്മൂട്ടിയാണെങ്കില്‍ ഏറെ സന്തോഷകരമാണെന്നും ഹിന്ദി സിനിമാ നടി ഡിമ്പിള്‍ കപാഡിയ.ബോംബെ മിഠായി എന്ന സിനിമയുടെ പ്രദര്‍ശനത്തോടനുബന്ധിച്ച് നഗരത്തിലെത്തിയ ഡിമ്പിള്‍ കപാഡിയ പ്രസ് ക്ലബില്‍ മീറ്റ് ദി പ്രസ് പരിപാടിയില്‍ സംസാരിക്കുകയായിരുന്നു .ആശയ സമ്പന്നതയാണ് മലയാള സിനിമകളുടെ പ്രത്യേകത ദേശീയ-അന്തര്‍ദേശീയ സിനിമാ ലോകത്തിന് മികച്ച സന്ദേശങ്ങളാണ് മലയാള സിനിമ നല്‍കുന്നത്.നമ്മുടെ ചുറ്റുപാടിലെ ജീവിത യാഥാര്‍ഥ്യങ്ങളാണ് 'ബോംബെ മിഠായി' ചര്‍ച്ചചെയ്യുന്നത്.എണ്‍പതുകളില്‍ തൊഴിലില്ലായ്മയായിരുന്നു പ്രശ്‌നമെങ്കില്‍ ഇന്ന് സമൂഹത്തില്‍ പ്രകടമാകുന്നത് തൊഴിലുണ്ടായിട്ടും പണത്തിനായുള്ള ആര്‍ത്തിയാണ്. ഇതാണ് സിനിമയുടെ ഇതിവൃത്തം. ഹിന്ദി സിനിമാതാരം ജയപ്രദയും പരിപാടിയില്‍ സംബന്ധിച്ചു.ഗൗരവക്കാരനായ രാഷ്ട്രീയക്കാരനെന്നാണ് താന്‍ അമര്‍സിങിനെ മനസ്സിലാക്കിയിരുന്നതെങ്കിലും ഈ സിനിമയിലെ പ്രകടനം അദ്ദേഹമൊരു കലാകാരന്‍ കൂടിയാണെന്നതിന് തെളിവാണെന്നും ജയപ്രദ പറഞ്ഞു.നായകന്‍ വിനുമോഹന്‍,നീലാംബരി, സംവിധായകന്‍ ഉമ്മര്‍ കരിക്കാട് തുടങ്ങിയവര്‍ പരിപാടിയില്‍ പങ്കെടുത്തു.