മോഹന്‍ലാല്‍ അരക്കള്ളന്‍, മമ്മൂട്ടി മുക്കാല്‍ കള്ളന്‍

പൃഥ്വിരാജ് പറയുന്നത് സത്യമാണ്. മമ്മൂട്ടിയും ലാലും ‘ഫ്രസ്ട്രേറ്റഡ്’ ആണ്. നല്ല കഥാപാത്രങ്ങള്‍, നല്ല സിനിമകള്‍ ഉണ്ടാകുന്നില്ല. ആഘോഷിക്കാന്‍ പറ്റിയ അടിപൊളി പടങ്ങള്‍ പോലും ബോക്സോഫീസില്‍ നിലതെറ്റി വീഴുന്നു. മമ്മൂട്ടിയോ മോഹന്‍ലാലോ അഭിനയിച്ചിട്ടും തിരക്കഥ മോശമായതിനാല്‍ പല ബിഗ്ബജറ്റ് സിനിമകളും തകര്‍ന്ന് തരിപ്പണമാകുന്നു. ഈ അവസ്ഥ മാറണമെങ്കില്‍ ഒരു വലിയ മാറ്റം ആവശ്യമാണ്. അതിനായി സൂപ്പര്‍താരങ്ങള്‍ യോജിച്ചൊരു തീരുമാനം കൈക്കൊള്ളണം.ഇപ്പോഴിതാ മമ്മൂട്ടിയും മോഹന്‍ലാലും യോജിച്ചൊരു തീരുമാനം കൈക്കൊണ്ടിരിക്കുന്നു - ഒന്നിച്ചു നീങ്ങുക. രണ്ട് വന്‍ താരങ്ങളുടെയും മലയാള സിനിമയുടെ തന്നെയും ഭാവിയെ സുരക്ഷിതമാക്കുന്ന നീക്കങ്ങളാണ് ഇരുവരും ചേര്‍ന്ന് കൈക്കൊള്ളുന്നത്. ഇതിന്‍റെ ഭാഗമായി ഇവര്‍ ഇരുവരും നായകന്‍‌മാരായി ഒരു സിനിമ അണിയറയില്‍ ഒരുങ്ങുന്നു. പടത്തിന്‍റെ പേര് - അരക്കള്ളന്‍ മുക്കാല്‍ കള്ളന്‍!അതേ, പ്രേംനസീറും അടൂര്‍ഭാസിയും തകര്‍ത്തഭിനയിച്ച സൂപ്പര്‍ഹിറ്റ് ചിത്രത്തിന്‍റെ പേരു തന്നെ. മോഹന്‍ലാല്‍ അരക്കള്ളനായും മമ്മൂട്ടി മുക്കാല്‍ കള്ളനായും അഭിനയിക്കുന്നു. തിരക്കഥ ആരുടേതായിരിക്കും? അതിന് മറിച്ചൊരു ഉത്തരമുണ്ടോ - ഉദയ്കൃഷ്ണയും സിബി കെ തോമസുമല്ലാതെ മറ്റാര്? എന്നാല്‍ സംവിധാനം ആരെന്ന് കേള്‍ക്കുമ്പോള്‍ സംഗതി കൂടുതല്‍ രസകരമാകും. ഉദയ്കൃഷ്ണ - സിബി കെ തോമസ് ടീം തന്നെയാണ് സംവിധാനവും. ഇരുവരും സംവിധായകരാകുന്ന ആദ്യചിത്രമാണ് അരക്കള്ളന്‍ മുക്കാല്‍ കള്ളന്‍. 2011 ഓണത്തിന് റിലീസ് ചെയ്യത്തക്ക രീതിയിലാണ് അണിയറയില്‍ കാര്യങ്ങള്‍ പുരോഗമിക്കുന്നത്. മമ്മൂട്ടിയുടെ പ്ലേഹൌസായിരിക്കും ചിത്രം നിര്‍മ്മിക്കുക. വിതരണവും പ്ലേഹൌസ് തന്നെ.