ത്രില്ലറിനും ബെസ്റ്റ് ഓഫ് ലക്കിനും മികച്ച തുടക്കം

ബലി പെരുന്നാളിനോടനുബന്ധിച്ച് പുറത്തിറങ്ങിയ മലയാള ചലച്ചിത്രങ്ങള്‍ക്ക് മികച്ച തുടക്കം. ബി.ഉണ്ണികൃഷ്ണന്‍ പൃഥ്വിരാജിനെ നായകനാക്കി ഒരുക്കിയ 'ദി ത്രില്ലര്‍', എം.എ നിഷാദ് യുവതാരങ്ങളെ അണിനിരത്തി ഒരുക്കിയ 'ബെസ്റ്റ് ഓഫ് ലക്ക്' എന്നിവയാണ് 17ന് പുറത്തിറങ്ങിയ ചിത്രങ്ങള്‍.

പേരു പോലെത്തന്നെ ത്രില്ലടിപ്പിക്കുന്ന രംഗങ്ങളുമായാണ് യുവ ആക്ഷന്‍ നായകന്‍ പൃഥ്വിരാജിന്റെ 'ദി ത്രില്ലര്‍' റിലീസായത്. ഹൈവേ കൊലപാതകം അന്വേഷിക്കുന്ന കുറ്റാന്വേഷണ സസ്പെന്‍സ് ത്രില്ലറാണ് ചിത്രം. പൃഥ്വിയുടെ നിരഞ്ജന്‍ എന്ന അന്വേഷണോദ്യോഗസ്ഥന്‍ കൈയടി നേടുന്നുണ്ട്.

മിക്ക തീയറ്ററുകളിലും മികച്ച ഇനിഷ്യലാണ് ചിത്രത്തിന്.

എം.എ നിഷാദിന്റെ യുവതാരചിത്രം 'ബെസ്റ്റ് ഓഫ് ലക്ക്' മമ്മൂട്ടിയുടെ അതിഥി വേഷത്തിന്റെ പകിട്ടില്‍ മികച്ച തുടക്കം നേടി. ആസിഫ് അലി, കൈലാഷ്, റീമാ കല്ലിംഗല്‍, പ്രഭു, ഉര്‍വശി, സുരാജ് തുടങ്ങിയവരാണ് പ്രധാന താരങ്ങള്‍. ശരാശരിക്കുമുകളില്‍ അഭിപ്രായവും ചിത്രത്തിനുണ്ട്.

മുന്‍ വാരങ്ങളില്‍ പുറത്തിറങ്ങിയ ചിത്രങ്ങളില്‍ ദിലീപിന്റെ 'കാര്യസ്ഥന്‍' മിക്ക കേന്ദ്രങ്ങളിലും നല്ല കലക്ഷനോടെ മുന്നേറുന്നു. സജി സുരേന്ദ്രന്റെ 'ഫോര്‍ ഫ്രണ്ട്സ്', അമല്‍ നീരദിന്റെ 'അന്‍വര്‍' എന്നീ ചിത്രങ്ങള്‍ നഗരകേന്ദ്രങ്ങളില്‍ ഹൈക്ലാസ് പ്രേക്ഷകരുടെ ബലത്തില്‍ തുടരുന്നു.