യുവതാരങ്ങള്‍ അഹങ്കാരികളല്ല: മമ്മൂട്ടി

“എന്നെ ഇഷ്ടമുള്ളവര്‍ എന്‍റെ സിനിമകള്‍ കണ്ടാല്‍ മതി” എന്ന പ്രസ്താവന ബിഗ് സ്റ്റാര്‍ പൃഥ്വിരാജിന്‍റെ വകയാണ്. ഇത് കേട്ടവര്‍ കേട്ടവര്‍ ‘അഹങ്കാരി’ എന്ന ഗണത്തില്‍ അദ്ദേഹത്തെ ഉള്‍പ്പെടുത്താന്‍ ശ്രമിച്ചു. എന്നാല്‍ മെഗാസ്റ്റാര്‍ മമ്മൂട്ടി പറയുന്നത് ശ്രദ്ധിക്കുക - മലയാളത്തിന്‍റെ യുവതാരങ്ങള്‍ അഹങ്കാരികളോ ധിക്കാരികളോ അല്ല!

“നമ്മുടെ യുവതാരങ്ങള്‍ ധിക്കാരികളാണെന്ന് എനിക്ക് തോന്നുന്നില്ല. സീനിയേഴ്സിനോട് ബഹുമാനമില്ലാത്തവരാണെന്നും അഭിപ്രായമില്ല. മറിച്ച് ചിന്തിക്കാന്‍ എനിക്ക് അങ്ങനെ ഒരനുഭവം ഇല്ല. ഇത് ഒരു പുതിയ തലമുറയാണ് എന്നത് ഏവരും ഓര്‍ക്കേണ്ടതാണ്. അവരുടെ പെരുമാറ്റം തികച്ചും വ്യത്യസ്തമായിരിക്കും.” - മമ്മൂട്ടി പറയുന്നു.

പൃഥ്വിരാജിന്‍റെ പ്രസ്താവനകള്‍ എപ്പോഴും വിവാദങ്ങള്‍ സൃഷ്ടിച്ചിരുന്നു. സൂപ്പര്‍താരങ്ങളെക്കുറിച്ചുള്ള തന്‍റെ അഭിപ്രായങ്ങള്‍ വെട്ടിത്തുറന്നു പറയാനും പൃഥ്വി മടി കാണിച്ചില്ല. ഇതുപലപ്പോഴും തെറ്റിദ്ധാരണകള്‍ക്ക് വഴിവച്ചു. എന്നാല്‍ പൃഥ്വിയെ അംഗീകരിക്കാനുള്ള മനസ് മമ്മൂട്ടി പ്രകടിപ്പിച്ചു. പോക്കിരിരാജ എന്ന സിനിമയിലൂടെ. ‘ഞങ്ങള്‍ രണ്ടല്ല, ഒന്നാണ്’ എന്ന് മമ്മൂട്ടി പോക്കിരിരാജയില്‍ പ്രഖ്യാപിക്കുമ്പോള്‍ തിയേറ്ററുകളില്‍ ഉയര്‍ന്ന കരഘോഷം ഓര്‍ക്കുക.

“പുതിയ താരങ്ങളുടെ വരവ് എക്കാലവും നടക്കുന്ന ഒരു പ്രോസസാണ്. യഥാര്‍ത്ഥമായ കഴിവുള്ളവര്‍ അതിജീവിക്കുന്നു. ഇന്ന് കഴിവുള്ള ഒട്ടേറെ യുവതാരങ്ങള്‍ മലയാള സിനിമയിലുണ്ട്. ആരുടെയും പേരെടുത്ത് പറയുന്നില്ല, ബാക്കിയുള്ളവര്‍ക്ക് വിഷമമായാലോ?” - മമ്മൂട്ടി പറയുന്നു.