*പ്രമാണിയില്‍ മമ്മൂട്ടിക്കൊപ്പം ഫഹദ് ഫാസില്‍

മമ്മൂട്ടി നായകനാക്കി ബി ഉണ്ണികൃഷ്ണന്‍ ഒരുക്കുന്ന 'പ്രമാണി'യില്‍ ഫാസിലന്റെ മകന്‍ ഫഹദ് ഫാസിലും അഭിനയിക്കുന്നു. ഷാനു എന്ന പേരില്‍ ഫാസില്‍ സംവിധാനം ചെയ്ത 'കൈയ്യെത്തും ദൂരത്ത്' എന്ന ചിത്രത്തിലൂടെ വെള്ളിത്തിരയിലെത്തിയ ഫഹദ് ചിത്രം പരാജയപ്പെട്ടതോടെ സിനിമാഭിനയത്തിന് അവധി കൊടുത്ത് ഉന്നത പഠനത്തിനായി വിദേശത്തേക്ക് പറന്നിരുന്നു.

അഞ്ച് വര്‍ഷത്തിന് ശേഷം കേരള കഫേയില്‍ ഉദയ് അനന്തന്‍ ഒരുക്കിയ മൃത്യുജ്ഞയത്തിലൂടെയാണ് അഭിനയരംഗത്തേക്ക് ഫഹദ് തിരിച്ചുവരവ് നടത്തിയത്. നിരൂപക പ്രശംസ നേടിയ മൃത്യുജ്ഞയത്തിലെ അഭിനയത്തിന് ശേഷം വെള്ളിത്തിരയില്‍ തന്റെ സാന്നിധ്യം ഊട്ടിയുറപ്പിക്കുന്നതിനുള്ള അവസരമാണ് താരത്തിന് പ്രമാണിയിലൂടെ ലഭിച്ചിരിയ്ക്കുന്നത്. ചിത്രത്തില്‍ മമ്മൂട്ടിക്കൊപ്പം തോളോട് തോള്‍ ചേര്‍ന്ന് നില്‍ക്കുന്ന കഥാപാത്രമാണ് ഫഹദിന് വേണ്ടി ഒരുക്കിയിരിക്കുന്നത്.

ഉണ്ണികൃഷ്ണന്‍ തന്നെ തിരക്കഥയൊരുക്കുന്ന ചിത്രത്തില്‍ അഴിമതി വീരനും നാട്ടുപ്രമാണിയുമായ പഞ്ചായത്ത് പ്രസിഡന്റ് രാഘവപ്പണിക്കര്‍ എന്ന കഥാപാത്രത്തെയാണ് മമ്മൂട്ടി അവതരിപ്പിയ്ക്കുന്നത്. ഇരുപത്തിയഞ്ച് വര്‍ഷമായി ഒരു പഞ്ചായത്തിന്റെ പ്രസിഡന്റ് പദത്തിലിരുന്ന സമ്പത്ത് വാരിക്കൂട്ടിയ ആളാണ് രാഘവപ്പണിക്കര്‍.

സമ്പാദ്യം കുന്നുകൂടിയിട്ടും നാടിനെയും നാട്ടുകാരെയും സേവിയ്ക്കാനുള്ള രാഘവപ്പണിക്കരുടെ മോഹത്തിന് യാതൊരു കുറവുമില്ല. താനൊരു പ്രമാണിയാണെന്ന് സ്വയം വിശ്വസിയ്ക്കുകയും മറ്റുള്ളവരെ അംഗീകരിയ്ക്കാന്‍ ശ്രമിയ്ക്കുകയും ചെയ്യുന്ന രാഘവപ്പണിക്കരുടെ ജീവീതമാണ് ബി ഉണ്ണികൃഷ്ണന്‍ പ്രമാണിയിലൂടെ അവതരിപ്പിയ്ക്കുന്നത്.

ജഗതി, സിദ്ദിഖ്, സുരാജ് വെഞ്ഞാറമ്മൂട്, ജനാര്‍ദ്ദനന്‍, ബാബുരാജ്, കെപിഎസി ലളിത എന്നിങ്ങനെ വന്‍താര നിര തന്നെ പ്രമാണിയില്‍ അണിനിരക്കുന്നുണ്ട്. സ്‌നേഹയോ കമാലിനി മുഖര്‍ജിയോ മമ്മൂട്ടിയുടെ നായികയായെത്തുമെന്നാണ് സൂചന. ബിസി ജോഷി നിര്‍മ്മിയ്ക്കുന്ന ചിത്രത്തിന്റെ ഷൂട്ടിങ് ഡിസംബര്‍ 18ന് ആരംഭിയ്ക്കും.

*പഴശ്ശിരാജക്കു വേണ്ടി എച്ച് ബി ഒ

ബോക്‌സ് ഓഫീസില്‍ പുതുചരിത്രം രചിയ്ക്കുന്ന പഴശ്ശിരാജ മലയാള സിനിമയ്ക്ക് പുതിയ വിപണന സാധ്യതകള്‍ തുറക്കുന്നു മോളിവുഡിലെ എക്കാലത്തെയും കൂറ്റന്‍ ബജറ്റായ 27 കോടി രൂപ മുടക്കി തിയറ്ററുകളിലെത്തിച്ച പഴശ്ശിരാജ വാങ്ങാന്‍ ഹോളിവുഡ് മൂവി ചാനലായ എച്ച്ബിഒ ഒരുങ്ങുന്നുവെന്നാണ് ഏറ്റവും പുതിയ വാര്‍ത്ത.

ഇത് സംബന്ധിച്ച് നേരത്തെ റിപ്പോര്‍ട്ടുകളുണ്ടായിരുന്നെങ്കിലും ചലച്ചിത്ര രംഗത്തെ പ്രമുഖരായ ചിലര്‍ തന്നെയാണ് ഇക്കാര്യം ഇപ്പോള്‍ സ്ഥിരീകരിച്ചിരിയ്ക്കുന്നത്. മലയാളത്തിലെ ഒരു പ്രമുഖ വാരികയ്ക്ക് നല്‍കിയ അഭിമുഖത്തില്‍ സംവിധായകന്‍ അന്‍വര്‍ റഷീദാണ് പഴശ്ശിരാജ വാങ്ങാന്‍ എച്ച്ബിഒ ചാനല്‍ രംഗത്തുണ്ടെന്ന കാര്യം വെളിപ്പെടുത്തിയത്.

മലയാള സിനിമകളുടെ നിര്‍മാണ ചെലവ് മൂന്നരക്കോടിയില്‍ ഒതുക്കണമെന്ന നിര്‍മാതക്കളുടെ സംഘടനയുടെ നിര്‍ദ്ദേശത്തെ പരാമര്‍ശിയ്ക്കുമ്പോഴാണ് പഴശ്ശിരാജയിലൂടെ മലയാള സിനിമയിലെത്തിയ പുതിയ ബിസിനസ് സാധ്യതകള്‍ അന്‍വര്‍ ചൂണ്ടിക്കാണിച്ചത്.

"പഴശ്ശിരാജ ചിത്രീകരിയ്ക്കുമ്പോള്‍ അതിന്റെ നിര്‍മാതാവിനും സംവിധായകനും മാത്രമേ ആ പ്രൊജക്ടിനെക്കുറിച്ച് വിശ്വാസമുണ്ടായിരുന്നുള്ളൂ. എന്നാല്‍ ആ സിനിമ പുറത്തുവന്ന് ഹിറ്റായപ്പോള്‍ എല്ലാവരും 'പഴശ്ശിരാജ'യുടെ ആളുകളായി. ആ സിനിമയ്ക്കിപ്പോള്‍ പ്രതീക്ഷിയ്ക്കാത്ത പല ബിസിനസുകളും വന്നു ചേരുന്നുണ്ട്. എച്ച്ബിഒ ചാനലുകാര്‍ സിനിമ ഇഷ്ടപ്പെട്ട് 18 കോടിയ്ക്ക് സാറ്റലൈറ്റ് അനുമതി വാങ്ങാന്‍ പോകുന്നുവെന്ന് കേള്‍ക്കുന്നു. ഇത്രയും വലിയ തുകയ്ക്ക് എച്ച്ബിഒ സിനിമ സ്വന്തമാക്കാനുണ്ടെങ്കില്‍ മൂന്നരക്കോടിയ്ക്ക് സിനിമ ചെയ്യാവൂ എന്ന് നിബന്ധ വെയ്‌ക്കേണ്ട കാര്യമില്ല- അന്‍വര്‍ റഷീദ് പറഞ്ഞു.

അതേ സമയം സിനിമയുടെ നിര്‍മാണ ചെലവിനെ കടത്തിവെട്ടുന്ന തുകയാണ് പഴശ്ശിക്ക് എച്ച്ബിഒ ഓഫര്‍ ചെയ്തതെന്ന് സ്ഥിരീകരിയ്ക്കാത്ത റിപ്പോര്‍ട്ടുകളുണ്ട്. ഡിജിറ്റല്‍ ഓവര്‍സീസ് റൈറ്റില്‍ ഏറ്റവും വലിയ തുക ലഭിച്ച ഗജിനിയ്ക്ക് മേലെയാണ് എച്ച്ബിഒ പഴശ്ശിയ്ക്ക് വിലയിട്ടതെന്ന് ചില മൂവി വെബ്‌സൈറ്റുകള്‍ റിപ്പോര്‍ട്ട് ചെയ്യുന്നു. അമീര്‍ ഖാന്റെ സൂപ്പര്‍ ഹിറ്റ് ബോളിവുഡ് സിനിമയായ ഗജിനിയ്ക്ക് 22 കോടിയാണ് ഇത്തരത്തിലുള്ള കച്ചവടത്തില്‍ ലഭിച്ചത്.

അതേ സമയം തിയറ്ററുകളിലെത്തി ഒരു മാസം പിന്നിട്ടപ്പോള്‍ കേരളത്തില്‍ നിന്ന് മാത്രം പഴശ്ശിരാജ 12.5 കോടിയിലധികം കളക്ട്് ചെയ്തുവെന്നാണ് റിപ്പോര്‍ട്ടുകള്‍. കേരളത്തില്‍ നിന്ന് ചിത്രം മുടക്കുമുതല്‍ സ്വന്തമാക്കുമെന്നാണ് സിനിമാ പണ്ഡിറ്റുകള്‍ പ്രവചിയ്ക്കുന്നത്. കഴിഞ്ഞ ദിവസം റിലീസ് ചെയ്ത തമിഴ് പതിപ്പിനും ആവേശകരമായ സ്വീകരണമാണ് ലഭിച്ചിരിയ്ക്കുന്നത്.

അതിനിടെ പഴശ്ശിരാജയുടെ ഹോം വീഡിയോ റൈറ്റ് വന്‍ തുകയ്ക്ക് സ്വന്തമാക്കിയതായി മോസര്‍ ബെയര്‍ അധികൃതര്‍ സ്ഥിരീകരിച്ചു. ചിത്രത്തിന്റെ ഡിവിഡി, വിസിഡി, ബ്ലൂ റേ തുടങ്ങിയ ഫോര്‍മാറ്റുകളുടെ അവകാശമാണ് മോസര്‍ ബെയര്‍ വാങ്ങിയത്.

ഇതാദ്യമായാണ് ഒരു മലയാള സിനിമയുടെ ബ്ലൂ റേ അവകാശം വാങ്ങുന്നതെന്ന് മോസര്‍ ബെയര്‍ തലവന്‍ ജി ധനജ്ഞയന്‍ പറഞ്ഞു. 2010ല്‍ ചിത്രത്തിന്റെ വിവിധ വീഡിയോ ഫോര്‍മാറ്റുകള്‍ കമ്പനി വിപണിയിലെത്തിയ്ക്കും.

സിനിമയുടെ പ്രാധാന്യം കണക്കിലെടുത്ത് മലയാളത്തില്‍ ഇതുവരെ നല്‍കിയിട്ടുള്ളതില്‍ വെച്ചേറ്റവും വലിയൊരു തുകയ്ക്കാണ് പഴശ്ശിരാജയുടെ വീഡിയോ റൈറ്റ് വാങ്ങിയതെന്നും മോസര്‍ ബെയര്‍ വെളിപ്പെടുത്തി. പഴശ്ശിരാജയുടെ മലയാളത്തിലെ സാറ്റലൈറ്റ് അവകാശം വന്‍ തുകയ്ക്ക് ഏഷ്യാനെറ്റ് നേരത്തെ സ്വന്തമാക്കിയിരുന്നു.

കടപ്പാട്:ദാറ്റ്സ് മലയാളം

pazhashiraja

dronar

chattampinadu

palerimanikyam