മമ്മൂട്ടി കള്ളം പറയുന്നു!

മമ്മൂട്ടി നുണയനാണ്. നുണയന്‍ എന്നുപറഞ്ഞാല്‍ അസ്സല്‍ പുളുവടി വീരന്‍! ആരാധകര്‍ കോപിക്കേണ്ട. അദ്ദേഹത്തിന്‍റെ ഒരു പുതിയ ചിത്രത്തെക്കുറിച്ചാണ് പറഞ്ഞുവരുന്നത്. യുവസംവിധായകന്‍ സജി സുരേന്ദ്രന് മമ്മൂട്ടി ഡേറ്റ് നല്‍കിയിരിക്കുന്നു. വായ തുറന്നാല്‍ കള്ളം മാത്രം പറയുന്ന ഒരു കഥാപാത്രത്തെയാണ് മമ്മൂട്ടിക്കു വേണ്ടി സജി തയ്യാറാക്കിയിരിക്കുന്നത്.



സജി സുരേന്ദ്രന്‍റെ സ്ഥിരം എഴുത്തുകാരനായ കൃഷ്ണ പൂജപ്പുരയാണ് ഈ ചിത്രത്തിന്‍റെയും തിരക്കഥാകൃത്ത്. സജിയും കൃഷ്ണയും അടുത്തിടെ മമ്മൂട്ടിയെ ഒരു ലൊക്കേഷനിലെത്തി കാണുകയും കഥ പറയുകയും ചെയ്തു. കഥ ഇഷ്ടപ്പെട്ട മെഗാസ്റ്റാര്‍ ഉടന്‍ തന്നെ തിരക്കഥ തയ്യാറാക്കാന്‍ ആവശ്യപ്പെട്ടിരിക്കുകയാണ്.



അടുത്ത വര്‍ഷമേ ഈ സിനിമയുടെ ചിത്രീകരണം ആരംഭിക്കുകയുള്ളൂ. അടുത്ത വര്‍ഷം ഓണത്തിനോ ക്രിസ്മസിനോ പ്രദര്‍ശനത്തിനെത്തിക്കത്തക്ക വിധത്തില്‍ പ്ലാന്‍ ചെയ്യാനാണ് സജിയോട് മമ്മൂട്ടി ആവശ്യപ്പെട്ടിരിക്കുന്നതെന്നറിയുന്നു.



സജി - കൃഷ്ണ പൂജപ്പുര ടീമിന്‍റെ ‘4 ഫ്രണ്ട്സ്’ പ്രദര്‍ശനത്തിന് തയ്യാറായിരിക്കുകയാണ്. മണിയന്‍‌പിള്ള രാജു നിര്‍മ്മിച്ച് പുതുമുഖങ്ങള്‍ അണിനിരക്കുന്ന ഒരു ചെറിയ ചിത്രവും സജി - കൃഷ്ണ പൂജപ്പുര ടീം ഏറ്റെടുത്തിട്ടുണ്ട്. ഈ സിനിമ ജനുവരി അവസാനം ചിത്രീകരണം ആരംഭിക്കും. ഇതിനു ശേഷമായിരിക്കും മമ്മൂട്ടിച്ചിത്രത്തിന്‍റെ ജോലി ആരംഭിക്കുക.



നര്‍മ്മത്തില്‍ പൊതിഞ്ഞ കുടുംബകഥ തന്നെയാണ് മമ്മൂട്ടിക്കായി സജി സുരേന്ദ്രനും കൃഷ്ണ പൂജപ്പുരയും തയ്യാറാക്കുന്നത്.